జనం న్యూస్ ప్రతినిధి, 25 జూన్ 2026 హైదరాబాద్: లంచం తీసుకుంటూ ఏసీబీకి రెడ్హ్యాండెడ్గా చిక్కి ఇప్పటికే సస్పెండ్ అయిన సబ్-రిజిస్ట్రార్ తుమ్మకొమ్మ సుచరితకు సంబంధించిన అక్రమాస్తుల వ్యవహారం సంచలనంగా మారింది. రూ.3 లక్షల లంచం స్వీకరిస్తూ పట్టుబడిన కేసులో విచారణ కొనసాగుతుండగా, ఆమెపై ఆదాయానికి మించిన ఆస్తుల (డిస్ప్రోపోర్షనేట్ అసెట్స్ – DA) కేసును కూడా ఏసీబీ నమోదు చేసింది. ఈ నేపథ్యంలో అధికారులు సుచరిత నివాసాలతో పాటు ఆమెకు సంబంధించిన ఇతర ప్రాంతాల్లో విస్తృతంగా సోదాలు నిర్వహించారు. సోదాల్లో భారీ మొత్తంలో స్థిర, చర ఆస్తులు వెలుగులోకి వచ్చినట్లు అధికారులు వెల్లడించారు. సిద్దిపేట జిల్లాలో 2.17 ఎకరాల వ్యవసాయ భూమి, హైదరాబాద్లో మూడు విలాసవంతమైన ఫ్లాట్లు, రెండు నివాస ప్లాట్లు ఉన్నట్లు గుర్తించారు. అలాగే వోక్స్వ్యాగన్, హ్యుందాయ్ క్రెటా కార్లతో పాటు రూ.1.2 కోట్ల విలువైన బంగారం, వజ్రాభరణాలు స్వాధీనం చేసుకున్నారు. అదనంగా రూ.12 లక్షల నగదు, బ్యాంకుల్లో రూ.38 లక్షల డిపాజిట్లు కూడా గుర్తించినట్లు సమాచారం. ఇప్పటివరకు గుర్తించిన ఆస్తుల మొత్తం విలువ సుమారు రూ.5.05 కోట్లుగా ఏసీబీ అంచనా వేసింది. ఈ ఆస్తులకు సంబంధించిన పత్రాలను అధికారులు స్వాధీనం చేసుకుని వాటి మూలాలపై లోతైన దర్యాప్తు కొనసాగిస్తున్నారు. అక్రమాస్తుల కేసులో మరిన్ని వివరాలు వెలుగులోకి వచ్చే అవకాశముందని అధికారులు పేర్కొన్నారు. ఈ ఘటన ప్రభుత్వ శాఖల్లో అవినీతిపై మరోసారి చర్చకు దారితీసింది. సుచరితకు సంబంధించిన ఆర్థిక లావాదేవీలు, ఆస్తుల కొనుగోళ్లపై ఏసీబీ అధికారులు సమగ్రంగా విచారణ చేపట్టగా, దర్యాప్తులో మరిన్ని సంచలన విషయాలు బయటపడే అవకాశం ఉందని సమాచారం.
