జనం న్యూస్ (మేడిపల్లి మండలం) సెప్టెంబర్ 03: తెలంగాణ రాష్ట్ర రోడ్డు రవాణా సంస్థ ఉప్పల్ డిపో ఎంప్లాయిస్ యూనియన్ గౌరవ అధ్యక్షుడిగా కాంగ్రెస్ సీనియర్ నాయకులు బండి శ్రీరాములు గౌడ్ నూతనంగా ఎన్నికయ్యారు. ఈ సందర్భంగా యూనియన్ రాష్ట్ర ప్రధాన కార్యదర్శి ఈదురు వెంకన్న ఆధ్వర్యంలో ఆయనను మర్యాదపూర్వకంగా కలిసి శాలువాతో ఘనంగా సత్కరించారు. పుష్పగుచ్ఛం అందజేసి నూతన బాధ్యతలకు శుభాకాంక్షలు తెలిపారు.
ఈ సందర్భంగా బండి శ్రీరాములు మాట్లాడుతూ ఉద్యోగుల సంక్షేమం, వారి హక్కుల పరిరక్షణ, సేవా భద్రత అంశాలపై యూనియన్ చేపట్టే ప్రతి కార్యక్రమానికి తన సంపూర్ణ సహకారం అందిస్తానని తెలిపారు. ఉద్యోగులు సంస్థకు వెన్నెముకలాంటివారని, వారి సమస్యల పరిష్కారానికి సమష్టిగా కృషి చేయాల్సిన అవసరం ఉందన్నారు. యూనియన్ బలోపేతం కావడం ద్వారా ఉద్యోగుల న్యాయమైన డిమాండ్లు ప్రభుత్వ దృష్టికి మరింత సమర్థవంతంగా చేరుతాయని పేర్కొన్నారు.ఉప్పల్ డిపోలో పనిచేస్తున్న ఉద్యోగుల సంక్షేమం, పని పరిస్థితుల మెరుగుదల, పెండింగ్ సమస్యల పరిష్కారం కోసం యూనియన్ నాయకత్వంతో కలిసి కృషి చేస్తానని ఆయన హామీ ఇచ్చారు. తనపై ఉంచిన నమ్మకాన్ని నిలబెట్టుకుంటూ గౌరవ అధ్యక్షుడిగా బాధ్యతలను సమర్థవంతంగా నిర్వర్తిస్తానని తెలిపారు.యూనియన్ నాయకులు మాట్లాడుతూ సామాజిక, రాజకీయ రంగాల్లో విశేష అనుభవం కలిగిన బండి శ్రీరాములు గౌరవ అధ్యక్షుడిగా ఎన్నిక కావడం ఉప్పల్ డిపో ఎంప్లాయిస్ యూనియన్కు మరింత బలం చేకూర్చే అంశమని పేర్కొన్నారు. ఉద్యోగుల సమస్యలను సంబంధిత అధికారుల దృష్టికి తీసుకెళ్లడంలో, పరిష్కార మార్గాలను అన్వేషించడంలో ఆయన అనుభవం ఎంతో ఉపయోగపడుతుందని అభిప్రాయపడ్డారు. ఉద్యోగుల ఐక్యత, సంఘటిత శక్తి ద్వారానే హక్కులు సాధ్యమవుతాయని, ఈ దిశగా యూనియన్ మరింత చురుకుగా పనిచేస్తుందని తెలిపారు.ఈ కార్యక్రమంలో రాష్ట్ర వర్కింగ్ ప్రెసిడెంట్ గోపాల్, రాష్ట్ర డిప్యూటీ జనరల్ సెక్రటరీ రాఘవులు, జీహెచ్జెడ్ అసిస్టెంట్ సెక్రటరీ, సికింద్రాబాద్ రీజినల్ ప్రెసిడెంట్ ప్రవీణ్ కుమార్ భాను, హైదరాబాద్ రీజినల్ సెక్రటరీ పాపయ్య గౌడ్, ఉప్పల్ డిపో అధ్యక్షుడు కాంతారావు, ఉపాధ్యక్షుడు సత్తయ్య గౌడ్, డిపో సెక్రటరీ ఎం.ఎస్. నారాయణ, జాయింట్ సెక్రటరీ సైదులుతో పాటు పలువురు యూనియన్ నాయకులు,కార్యకర్తలు, ఉద్యోగులు పాల్గొని బండి శ్రీరాములకు అభినందనలు తెలిపారు.
